 Den
11. November war et erëm souwäit. Déi traditionell Badische
Meile, de Karlsruher-Café-Ralley, organiséiert vum Dafcomité
fir d’Bleuen an hier Parrainen, stoung virun der Dir. Wéi
ëmmer hu mir eis Noopesch-Cerclen an hier Bleuen och invitéiert.
Eng kleng Stroossbuerger Delegatioun huet och de Wee bis op
d’Maartplaz fonnt. Schéi verkleet, schliisslech war et jo
Faschingsbeginn, goufe mer dann a véier Gruppe vu circa 10
Leit agedeelt. All Grupp krut eng Spaghetti, op déi si bis
zum Schluss huet missen oppassen. Hei gouf et well deen éischte
Skandal, well den Dafcomité de Spaghettipak aus den Ae verluer
huet, war eng Grupp am séiersten an huet dee ganz schnell
geklaut. Nodeems d’Stroossbuerger ee Karlsruher als Guide
zur Säit gestallt krute konnt et lass goen. 
Niewent der Aufgab mat der Spaghetti, stoungen um Startziedel
direkt e puer Aufgabe fir de Rescht vum Owend. E klengt Gedicht
sollt zesummegereimt ginn, woubäi verschidde Wieder onbedingt
hu missen drasin; ausserdeem sollt ee vun ënnerwee ganz vill
„Souveniren“ matbréngen. Dësweidere gouf et an all Café nach
e Questionnaire mat op de Wee. Lo ass et lassgaang mat de
Caféen. 4 Stéck stoungen um Programm, ier mer dann am 5.,
eisem Stammcafé ukomm si, wou d’Punkten ausgerechent goufen.
Am éischte Café gouf d’Fäegkeet vum Kapprechnen getest.
Dëst war allerdéngs just den Ufank vum Spill, well dat Rechnen
hat nëmmen een Ziel: Als Bonus fir all richtegt Resultat
krute mir Bastelsaachen, woumat mir ee schéine Männche baue
missen, wat een also méi richteg Äntwerten hat, wat ee méi
Material hat. Och hei huet den Dafcomité sech rëm e Lapsus
erlaabt, well déi läscht Grupp kruten net méi vill Pech,
deen haten déi Gruppe virdru sech als Souvenir agepaakt.
Weider ass et gaang duerch d’Karlsruher Foussgängerzon
an deen nächste Café. Hei goufe mer dann souguer vum Dafcomité
iwwerrascht an zum Drénken agelueden. Dat huet leider besser
geklong wei et letztendlech war, well dat hat natierlech
en Hoken. Gemengt war e groussen Eemer mat Krunnewaasser,
deen een huet missen sou schnell wei méiglech vernichten.
Niewebäi gouf och nach ee klenge Staffellaf gemaach, wat
fir d’Leit am Café zimlech witzeg war. Mat engem Tampon
ëm d’Hëft huet ee sech missen zimlech déif bécken, dass
deen dann an d’Fläsch gaangen ass an ofwaarden, bis e sech
mat Waasser vollgesuckelt hat. Eng Kéier vollgesuckelt hält
deen awer vill aus, well deen Owend goufen e puer Kuerzstrecke
Rekorder gebrach.
Am drëtte Café huet ee sech rëm missen zimlech ustrengen,
well hei huet ee missen a kuerzer Zäit sou vill wei méiglech
Saache verhalen, déi eis den Dafcomité gewisen huet. Leider
hunn hei och schonn erëm verschidde Gruppe sech Souvenire
matgeholl, sou dass zum Schluss den Dësch net méi komplett
war. Virun der Dir gouf dann nach en Äerlaf gestart an do
war déi Statioun och schonn erëm erleedegt.
 Déi
läscht Aufgabe gouf et dann am véierte Café, wou et direkt
sportlech weidergaang ass: Pompelen a Pils drénken, sou
schnell an sou vill wei méiglech, well och hei gouf d’Zäit
erëm gestoppt. Déi zweet Aufgab huet och net laang op sech
waarde gelooss. Eng Lëscht, 20 Saachen, 5 Minutten Zäit.
Top motivéiert huet déi läscht Grupp och ugefaang, mee wei
bis deen éischte Box an T-Shirt ausgedoen huet, goufe mir
„frëndlech“ gebueden, de Café ze verloossen, an sou hun
mer dat Spill an eisem Stammcafé, dem uBu, nei gestart.
Hei goufe mer och éischt e bësse komesch ugekuckt vun de
Client’en, nom „Wir sind Luxemburger, wir dürfen das“ war
awer alles ok a mir goufen souguer ugefeiert.
Hei am uBu war schliisslech och eis d’Ziel. All Grupp huet
hei musse säi gebastelte Männchen souwéi seng Souvenire
weisen (deen aneren Dag ware vill Baustellen net méi sou
gudd ausgeschëldert). All Grupp huet och nach d’Gedicht
virgedroen an dono war och schonn d’Präisverdeelung. Géint
halwer 3 hun mer eis dann och sou lues opgeléist, an d’Stroossbuerger
si all mat an d’Amueliestrooss getrëppelt, wou si nach monter
gekacht hunn an duerno och d’Nuecht verbruecht hunn.
|
